El problema de los residuos sólidos urbanos n’Asturies, nun ye pa nada cenciellu.
Semeya d'una incineradora de residuos urbanos
Un de los proyectos que’l PSOE plantegaba (y sigue planteando anque agora mesmo tean calladinos) pa esta llegislatura ye la construcción d’una incineradora de residuos urbanos, a la que s’opón el so actual sociu de gobiernu IU.
Paez que l’horizonte probable de saturación del vertederu de Serín, ye aproximadamente l’añu 2015, con una producción de residuos a lo llargo los próximos años, asemeyada a la de 2008, quiero puntualizar que la xeneración de residuos por habitante tien anguaño una tendencia alcista, n’Europa calcúlase qu’ente 2005 y 2020 va medrar un 25%.
Tal paez que’l debate ye cenciellu, una vegada que nos acerquemos a esi horizonte del 2015, ¿abrimos un vertederu nuevu o instalamos una incineradora? Esti debate ye falsu, y baxo l’apariencia d’una posible elección, lo que s’escuende ye tapecer información veraz y la falta d’interés pola xestión de los residuos de los gobiernos nacional y local. Nun podemos escaecer que la puxarra ye una competencia municipal.
Dende la creación de COGERSA en 1982, les polítiques que llevaron alantre foron, de mano, de recoyida y posteriormente de recicláu, pero COGERSA nun ye un órganu políticu, fai’l so trabayu con eficacia abonda y puntu. Nun ye COGERSA la que tien de diseñar, organizar y implementar polítiques de xestión de residuos, COGERSA tien d’asesorar, desarrollar y informar de la situación de les estratexes que los nuestros políticos deciden.
Con too y con ello, naide entamó entovía una estratexa a llargo plazu que permita minimizar la producción de residuos urbanos. La situación na que nos alcontramos agora nun ye culpa nin de COGERSA, que naide s’engañe, nin del diseñu del vertederu – nel momentu históricu nel que se creó les estimaciones yeren razonables-. Ye culpa de nun esmolecese por AMENORGAR los residuos. Ye imprescindible que’l Gobiernu d’Asturies y los sos conceyos, faigan tolos esfuerzos posibles p’AMENORGAR la cantidá de residuos, dalgo que nunca nun se fixo n’Asturies. Col envís de AMENORGAR, como fin fundamental, ye cuando vien lo de reutilizar y reciclar como estratexa paliativa. Pero en reutilizar y reciclar Asturies tampoco apreba, si la Europa de los 15 tá n’índices de reciclaxe alredor del 40%, n’Asturies tenemos unos porcentaxes averaos al 20%. [Fontes eurostat, INE, COGERSA y ellaboración propia]
Agora que sabemos que’l ñudu gordianu de la xestión de residuos ye amernorgar, necesitamos conocer de qué se compón la nuestra puxarra, tá aceptao abondo qu’una composicíon aproximada sedría un 50% de componente orgánicu, un 20% de papel y cartón, un 15% de plásticu y metal, un 5% de vidriu y un 10% de “otros” (aprox). [Entre otros] .
Sicasí too esto, que nun fai otro qu’amosar lo abegoso del panorama , nun da igua nenguna al problema de los residuos sólidos urbanos. Si nos paramos vemos que la fracción mayoritaria ye la órgánica, la metada aproximao de los residuos, y siendo consciente que ye la única que nun tien recoyida separtada, tamién vemos que la mayor parte de los residuos que van al vertederu son fracción orgánica. Teniendo en cuenta que con una política de reciclaxe “perfecta”, lo que hai qu’atalantar que ye imposible, alredor del 90% de lo que se llevaría a vertederu sedría la fracción orgánica, de la que naide nun se preocupa.
La igua como casi siempre va depender de los nuestros políticos (vamos daos), con una recoyida selectiva y un tratamientu técnicu complexu que voi resumir na palabra compostaxe, anque nun ye mui exacta, ya qu’esta triba de procesos desendólquense con dellos medios, podríemos amenorgar (que pesáu soi colo d’amenorgar) la cantidá de deposición en vertederu d’una forma espectacular, allargando la vida del actual vertedero actual en munchos años.
Los detractores del métodu, ensiguida nos cuenten que nel “compostaxe” hai refugu, que non tola materia ye compostable y qu’hai una perda de gases (fundamentalmente metanu) d’efectu invernaderu. Y ye verdá, el métodu de perfectu nun tien nada, pero por favor déxenme analizar la “alternativa” incineradora de residuos.
Les incineradores de residuos (incluso les modernes incineradores de llechu fluidizáu) nun son instrumentos máxicos que convierten la materia n’enerxía por alquimia propagandística de los nuestros políticos. Pa nada… al final, tolo qu’entra sal. Puedo asegurá-yoslo. Na fase sólida va volver (a vertederu) ente un 25 y un 35% (sumaos los distintos residuos sólidos) [Guía sobre xestión de residuos sólidos urbanos - Comunidad de Madrid], y que aproximadamadamente, de los qu’ente un 5 y un 10% son altamente tóxicos. Y evidentemente necesiten tratamientos posteriores (que tamién tienen los sos problemes) o bien la so deposición en vertederos de residuos tóxicos, más caros y perxudiciales que los vertederos habituales. Al final paez que la panacea de la incineración va complicándose adulces. Otra de les partes, que ye la gaseosa, va tar mayoritariamente compuesta por dióxidu de carbonu y agua, poco o nada problemáticos, pero va tener tamién, metales pesaos en suspensión, dioxines y furanos y óxidos ácidos (SO2 y NOx). Contaminantes que cuando tean vertíos al aire van ser arrastraos pol vientu trayendo contaminación al tarrén onde se depositen (inmisión). Ye cuasi imposible saber a ciencia cierta cual va ser el resultáu d’esta inmisión por cuenta de la estacionalidá de los vientos, y los pocos estudios qu’hai sobre la tema n’Asturies.
Paez difícil creyer que medioambientalmente ye meyor solución una incineradora qu’un métodu de “compostaxe”.
Con too, hai poco qu’el conseyeru de Mediu Ambiente, Ordenación del Territoriu y Infraestructures, Francisco González Buendía, pidía una solución al problema de la xestión de residuos urbanos (ver equí), y tien muncha razón ye un ploblema qu’entama a ser más que grave en varies comunidaes autónomes ente elles Asturies. Pal Sr Buendía la igua ye bastante cenciella, gastar una millonada nuna incineradora de residuos, qu’escuenda la incompetencia d’esti gobiernu pa facer una xestión de residuos digna y de pasu, y ya puestos, que produza enerxía como una más de les centrales térmiques que se va a implantar n’Asturies, a costa de contaminar entá más una de les zones más contaminaes d’Europa y la que más mortalidá tien d’España. Mentantu’l so sociu de gobiernu IU calla, nún silenciu cómpliz por que cada día que pasa ensin una xestión amañosa de residuos (eso d’amenorgar, reciclar, reaprovechar y “compostar” el restu orgánicu) ye un pasu más que damos hacia la incineradora de residuos. Ensiguida, a primeros de la próxima llexislatura, el PSOE va dicir que pa evitar males mayores va ser imprescindible construyir una incineradora de residuos urbanos, y lo pior ye que va ser verdá, depués de munchos años ensin una política de xestión de residuos racional, ensin la preocupación de los gobiernos asturianos pola tema, ensin que s’entamaren a cumplir los oxetivos del propiu gobierno del estáu (ya nun se cumplieron nel anterior plan nin raspiando, nesti barrunto que pasará lo mesmo), va ser verdá dafechu que ya nun va quedar otra.
Esto nun ye un datu nuevu, IU sábelo perfectamente, pero nun se fai nada pa dir hacia otru modelu de xestión de residuos. Esto ye igual qu’afitar que la incineradora va construise. Pa más aquello, tovía habrá qu’aguantalos na plataforma de turnu diciendo que tán en contra de la incineradora, eso sí cuando ya nun haya nada que facer y el PSOE vuelva a ganar la batalla al mediuambiente.
Si nun somos quién a que la clase política asturiana se mentalize de la importancia estrema que tien la xestión de residuos sólidos urbanos, y de que ya llevamos munchos años perdíos, van condenanos a más polución, a más contaminantes y a más problemes respiratorios y medioambientales pa siguir esportando ellectricidá. Nun ye asina.
Por motivos económicos
Por motivos de salú pública
Por sostenibilidá del mediuambiente
! Recoyida Selectiva ya! !Compostaxe ya!
Perbonu collaciu