Por raro que-y pueda paecer al nacionalismu español, a los nacionalistes periféricos hai poques coses que nos molesten más que les desigualdaes territoriales. Ye verdá, hai que decilo too, que nos paecen peor entá cuando lleguen impuestes polos gobiernos estatales, como asocede davezu.
Un bon exemplu d’esta situación ye’l tratamientu de los recursos naturales nos diferentes puntos del estáu español. Vivimoslo col agua. Los tresvases de les zones más probes del estáu a otres más riques, y nes qu’hai más votos, foron moneda de cambiu habitual ya dende primero de la democracia actual.
Como nota histórica el tresvase Tajo-Segura, entamó en 1933, la segunda república foi quién la planificó (Segunda república 1931-1936).
Foto del trasvase Tajo-Segura a su paso por Albacete.
Más recientemente el casu d’Aragón col Ebro, dexaba ver a les clares, que les polítiques territoriales del gobiernu central van al debalu y nun se correspuenden cola xestión eficiente de los recursos naturales, sinón con un intentu de control de votos de los sucesivos gobiernos del PSOE y PP. Existen abondos argumentos mediuambientales que permiten asegurar qu’un tresvase d’esta triba tien de ser una decisión mui meditada y tomada namás en casos de estrema gravedá.
N’Asturies vivimos otra cara de la desigualdá territorial, la producción enerxética. La producción d’un bien primariu ensin valor añedíu, altamente contaminante y que va afectar nel futuru a otres empreses que quieran venir a Asturies. Un modelu enerxéticu, deriváu d’un modelu territorial, que nos impón l’estáu central, nel nuestru casu col beneplácitu de tolos partíos con representación nel gobiernu d’Asturies y de los sindicatos mayoritarios que nos va obligar durante varies xeneraciones a ser la pila d’España. Una pila d’usar y tirar por supuestu. Otra vuelta, como nel casu del tresvase del Ebro, sobren argumentos mediambientales, económicos y sociales pa qu’esta barbaridá nun se lleve alantre. Pero les rexones riques nun quieren producir electricidá, eso nun trai riqueza, nun trai industria, nun trae un meyor nivel de vida. Trai contaminación.
La entruga, d’otra manera bien evidente ye, ¿Porqué una comunidá autónoma pue negase a aforrar agua, como nel casu de Valencia y otra tener que quedar ensin ella como nel casu d’Aragón? ¿Cómo pue ser qu’una comunidad autónoma se pueda negar a producir “ni un kilovatiu más” como nel casu de Madrid, y otra tenga qu’hipotecar el so futuru a cambiu de nada como ye’l caso d’Asturies? ¿Como pue tener Valencia campos de golf regaos día y nueche y a Aragón toca-y el desiertu de los Monegros?
Poblaciones del 1 al 4 y del 11 al 19
La solución ye bien cenciella, al estáu Español Asturies, Aragón, Baleares o la Rioja, por dicir unos, preocupamos-yos bien poco. Pasen. Da-yos igual. Ignórenmos. Namás valimos pa dar recursos al restu l’estáu, a los bonos, a los que producen, a los que tienen más renta per cápita, a los que los gobiernos centrales tienen que convencer, en votos, para siguir cortando’l bacalao.
El modelu territorial actual nun fundamenta la so xestión de los recursos naturales en xeneralos onde seya necesario, n’almacenalos onde se vea afechisco, en consideraciones de tipu científico-técnico, básase en que Madrid tea contento, en que lo tean Barcelona y Valencia.
Ya sé que’l nuestru modelu “democráticu” tien un senáu que debiera iguar de dacuala forma los conflictos que tienen que ver colos derechos de les Comunidades Autónomes. ¿Daquién sabe qué opina el senáu del plan enerxéticu estatal? Pa qué entrugo tonteríes, claro que non ¿Daquién sabe dalgo que faiga’l Senáu?, esa cámara de ¿representación? ¿territorial? nun articula nenguna solución qu’integre esta “España de les autonomíes”.
La situación de los recursos naturales camudaría con un modelu de cohesión territorial que non sólo tuviese afitáu nún tratáu perguapu, sinón nuna realidá estatal que permitiese la compensación económica de las rexones riques a les probes y que se basare en principios técnicos y/o medioambientales de desarrollu sostenible.
Llama l’atención que los partíos estatalistes (PP, PSOE, IU) caltengan un modelu de varies velocidaes, independientes de les necesidaes y/o desixencies de les autonomíes mentes que los diferentes nacionalismos periféricos, tenemos claru un modelo federal.
