Archivo de la etiqueta: bacteries

Basoria, bacteries y biodiesel.

Supongo que’l retu va siguir siendo tresformar el dióxidu de carbonu (CO2) en combustible utilizando enerxía solar, nun pierdo la esperanza, pero mentanto los problemes enerxéticos de la humanidá siguen siendo noticia. Los costosos y agresivos col medioambiente tendíos d’alta tensión, la xeneración de CO2 debida a los combustibles fósiles y el so efectu invernaderu, asina como les posibles soluciones a estos problemes enerxéticos, tán diariamente nes páxines de los periódicos, especialmente de los económicos.
Puede ser reduccionista, pero postreramente y por agora, pa xenerar un combustible precisamos materia orgánico, yá sía agrodiesel llográu de plantíos destinaos a esti fin, biodiesel llográu a partir de basories orgániques de dalguna industria o estrayigamos combustibles fósiles del interior de la tierra (carbón, petróleu, gas natural). Les diferencies son en to casu notables.
Los combustibles fósiles tienen un efectu perimportante nel aumentu de CO2 na atmósfera, debio a que anates teníamos una gran cantidá de carbonu almacenao na tierra y agora tenémosla en forma de dióxidu de carbonu verbenando pel aire, esto xuníu a la inestabilidá de los precios de la materia prima por motivos xeopolíticos y económicos, nun paecen encamentar l’usu estensivu d’esti tipu de combustibles.
La producción de agrodiesel, tien efectu invernaderu nulu (esto ye matizable, pero déxolo pa otru momentu), sicasí ye necesariu dedicar grandes estensiones de tierra al so cultivu, que por tantu non podrán utilizase pa l’agricultura tradicional qu’anguaño ye la que caltien a la población humana. Ye una forma de camudar alimentos per enerxía.
La producción de biodiésel, a partir de desehechos d’industries, non sólo tien una tasa cero de producción de CO2, sinón qu’amás nos llibrará d’una borrafa que davezu tamién supon un problema ambiental.

E. Coli es la bacteria modificada genéticamente que se usa para la obtención de biodiesel.

C. Commons - E. Coli


Sicasí poques vegaes tiense en cuenta qu’esiste otru importante focu de materia orgánico que tamién supon un problema ambiental, como son los residuos sólidos urbanos (RSUs), aprosimao’l 50% de les nueses basures son basories sólides urbanes, esto supon cantidaes perimportantes de materia qu’a cencielles se descompondrá ensin nengún tipu d’aprovechamientu. Al contrariu amás d’ocupar un gran volume nun vertideru, darréu va producir CO2 y metano (CH4), quiero puntualizar equí qu’el metano ye entá peor pal cambéu climáticu qu’el mesmu CO2.
Sicasí la tresformación de la parte orgánica de la basoria per parte de les bacteries nun tien por que ser completa, pudiéndose algamar que mientres la tresformación llógrense distintos tipos de combustibles, dalgunos d’ellos, como’l biodiesel van ser directamente aplicables como combustibles de vehículos a motor, otros podríen ser utilizaos pa otru tipu d’aprovechamientu enerxéticu, en motores especialmente afechos o bien para la so valorización enerxética final. Ye importante decatase qu’esto tien un efectu invernaderu total cero y amás allongaría descomanadamente la vida de los vertideros de RSUs.
Quiciabes inda nun podamos ser como les plantes y producir materia orgánico a partir de CO2, pero pelo menos podemos aprovechanos de les bacteries y convertir un problema nuna solución enerxética. ¿Nun merez la pena intentalo?

De xuru daquién apuntarame col deu, y dirá que toy como una maniega,
Microbiology (vol 152, p 2529)

Anuncios